Fannar Daði Malmquist Gíslason lék sinn fyrsta leik í rúmt ár fyrir Þór í dag þegar hann kom inn á sem varamaður í 3-1 sigri liðsins gegn Leikni í Mjókurbikarnum.
Lestu um leikinn: Þór 3 - 1 Leiknir R.
Hann sleit krossband í leik gegn Kórdrengjum síðasta sumar og hefur verið í langri og strangri endurhæfingu síðan. Hann kom inn á í dag og átti stóran þátt í þriðja marki liðsins.
„Það er alltaf gaman að vinna, bara þrír leikir í Evrópu núna," sagði Fannar eftir sigurinn.
„Það var mjög gaman að koma inn á, þetta er búið að vera helvíti langur tími sem ég er búinn að missa af. Maður var klár fyrir tveimur mánuðum en þá komu smávægileg meiðsli. Þetta hefur tekið á, likamlega og andlega."
Aron Einar Gunnarsson frændi Fannars bauð honum til sín til Katar þar sem Fannar fór í endurhæfingu á Aspetar sjúkrahúsinu þar sem margir af stærstu íþróttamönnum heims hafa leitað til.
„Ég fór þangað í tvær vikur, var með góðum sjúkraþjálfurum þar. Komst í annað umhverfi, komast úr þessum kulda hér, alltaf sömu æfingarnar, bara prófa eitthvað nýtt," sagði Fannar.
„Það var góð upplifun að fara út. Gaman að sjá landið og fara á alvöru æfingar."