Selfoss lenti ekki í vandræðum með Dalvík/Reyni er liðin mættust í 2. deildinni fyrr í kvöld.

Selfyssingar höfðu tapað þremur leikjum í röð og voru byrjaðir að dragast afturúr í toppbaráttunni svo sigur gegn Dalvíkingum var bráðnauðsynlegur.

Kenan Turudija skoraði tvennu í fyrri hálfleik. Eftir leikhlé bættu Adam Örn Sveinbjörnsson og Guðmundur Tyrfingsson við svo lokatölur urðu 4-0.

Selfoss er í þriðja sæti eftir sigurinn, fimm stigum frá toppliði Leiknis F. sem á leik til góða. Dalvík er í sjötta sæti, tveimur stigum á eftir Selfossi.