„Þetta er bara fúlt. Það vantaði að klára færin, mér finnst við fá töluvert betri færi, sérstaklega í fyrri hálfleik og við eigum bara að klára það," sagði Haukur Páll Sigurðsson, fyrirliði Vals, eftir tap gegn KA í á heimavelli í dag.
Lestu um leikinn: Valur 0 - 1 KA
„KA er gott lið og þeir nýttu sín færi. Við fáum dauðafæri en það er bara að halda áfram."
Sigurmark KA kom eftir að aðstoðardómari lyftir flaggi sínu en dómari leiksins dæmir mark eftir stuttan fund. Sebastian Hedlund skallaði fyrirgjöf Hallgríms Mar Steingrímssonar áfram og Jakob Snær Árnason tók við boltanum og skoraði.
„Í mómentinu þá bara flaggar hann. Þá heldur maður bara að það sé rangstaða, svo tala þeir sig eitthvað saman og dæma mark. Ég veit ekki hvort hann var fyrir innan eða ekki, auðvitað verður maður svekktur þegar maður sér flaggið koma upp og að því sé svo breytt. Við verðum að treysta því að þetta sé rétt hjá þeim."
Ertu ósáttur að flaggið fari upp?
„Ég er enginn dómari þótt ég tuði nú einstaka sinnum yfir einhverjum dómum. Flaggið fór upp og þá ætlast maður til að það sé dæmd rangstaða. Pétur sér eitthvað annað, að boltinn komi af einhverjum öðrum leikmanni og þá sé hann ekki rangstæður. Það er bara eins og það er."
Haukur segir Valsmenn þurfa að halda áfram en möguleikinn á Evrópusæti sé ekki í þeirra höndum. „Við verðum bara að sýna úr hverju við erum gerðir og halda áfram að reyna sækja sigra."
Viðtalið í heild sinni má sjá í spilaranum að ofan.
Athugasemdir