Rúnar fékk hugdettu skömmu fyrir leik - „Fannst ég hafa gleymt einu atriði"

Af hverju var hún teiknuð upp rétt fyrir leik? Var það eitthvað í liði KA sem þú sást eða vildir þú að strákarnir hefðu ekki tíma til að gleyma henni?

„Þetta var eiginlega bara eitthvað sem ég hafði ekki haft tíma í eða gleymt að gera fyrr. Þetta skaust upp í kollinn á mér sem leið fyrir okkur. Það er svo ofboðslega margt sem maður vill fara í gegnum fyrir leik, maður teiknar upp einhver taktísk atriði eða varnar/sóknarleik og föst leikatriði. Oft er þetta svipað, en stundum kemur eitthvað nýtt upp í hugann. Það getur gerst líka á síðustu stundu. Mér fannst ég hafa gleymt einu atriði í undirbúningnum, þannig ég tók þá helstu sem þetta snerist um; þetta snýr að einföldum færslum og einfaldar sendingar á ákveðna staði. Ég labbaði í gegnum þetta með nokkrum inn í klefa, talaði við menn til að gefa þeim valmöguleika. Þú getur ekki teiknað upp hverja einustu sókn og hverja einustu færslu, en það er hægt að gefa mönnum einfaldar leiðir ef menn lenda í vandræðum í ákveðnum stöðum. Þetta var ein leið sem ég þurfti að setja nokkra inn í."

Í grunninn, snerist þetta um að vinna í kringum framherjann Atla Þór Jónasson?

„Vinna í kringum Atla og Vuk, og líka ógna inn fyrir vörnina. Þú veist ekki hvort að liðin mæta í hápressu eða leggjast neðar. Þú þarft að vera með einhverjar leiðir fyrir hvort heldur sem er. Í nútímafótbolta eru allir að reyna spila sig í gengum varnir andstæðinganna: frá markmanni og upp í gegnum miðjuna. Stundum er hægt að fara í beinni línu og hraðar. Sérstaklega þegar lið koma framar á völlinn á móti manni. Þá er hægt að setja boltann inn fyrir eða í svæðin fyrir framan þá þegar lið fara í hápressu," segir Rúnar.

Fram situr í 3. sæti deildarinnar, liðið mætir næst toppliði Víkings á heimavelli á sunnudagskvöld.