AS Roma vann kapphlaupið um albanska miðvörðinn Marash Kumbulla, sem er aðeins tvítugur.
Kumbulla var eftirsóttur víða um Evrópu og voru stórlið úr ensku úrvalsdeildinni orðuð við hann, þar á meðal Tottenham, Chelsea og Manchester United. Á Ítalíu var hann orðaður við félög á borð við Inter, Lazio og Napoli.
Kumbulla átti frábært tímabil með Verona á síðustu leiktíð og var gífurlega eftirsóttur í kjölfarið. Hann er genginn til liðs við Roma á lánssamningi með kaupskyldu.
Roma greiðir tæplega 30 milljónir evra í heildina fyrir varnarmanninn öfluga sem mun berjast við Juan Jesus, Federico Fazio og Gianluca Mancini um sæti í byrjunarliðinu.
Athugasemdir