Pepsi Max-deildin: KA valtaði yfir Val í síðari hálfleik

Síðasti leikur dagsins í Pepsi Max deild karla var viðureign Vals og KA á Hlíðarenda. Bæði lið áttu möguleika á Evrópusæti fyrir leikinn í dag og því mikið undir.

KR tapaði gegn Víking fyrr í dag og því myndi liðið sem tæki þrjú stig í kvöld fara í þriðja sætið deildarinnar.

Valsmenn byrjuðu betur en bakvörðurinn Birkir Már Sævarsson kom þeim yfir í byrjun leiks. Sebastiaan Brebels jafnaði metin og var staðan 1-1 í hálfleik.

KA gekk frá leiknum í síðari hálfleiknum. Þrjú mörk á átján mínútna kafla sáu til þess að KA fer með þrjú stigin norður í Eyjafjörðinn. Nökkvi Þeyr Þórisson, Brebels og Elvar Árni Aðalsteinsson gerðu mörkin.

KA er nú í þriðja sæti deildarinnar og mætir FH í lokaumferðinni um næstu helgi. Vinni Víkingur Mjólkurbikarinn þá mun 3. sætið í deildinni gefa Evrópusæti.