Albert spilar með Malinovskyi og Messias í vetur (Staðfest)

Albert Guðmundsson var í lykilhlutverki í Serie B en núna er komin aukin samkeppni um byrjunarliðssæti í framlínunni.

Úkraínumaðurinn Ruslan Malinovskyi er kominn á lánssamningi frá Olympique Marseille í Frakklandi ásamt miðjumanninum Kevin Strootman, sem kemur á frjálsri sölu.

Malinovskyi var einn af bestu leikmönnum Atalanta í Serie A áður en félagið seldi hann til Marseille í fyrra, en hann passar ekki inn í leikkerfið þar svo félagið er að reyna að losa sig við hann.

Malinovskyi er 30 ára gamall og kom að 58 mörkum í 143 leikjum á dvöl sinni hjá Atalanta. Strootman er 33 ára og hefur í heildina spilað 50 leiki fyrir Genoa þegar hann var lánaður til félagsins á síðustu leiktíð og 2020/21.

Þá er brasilíski kantmaðurinn Junior Messias kominn á lánssamningi frá AC Milan. Messias er 32 ára og kom að 17 mörkum í 68 leikjum hjá Milan.

Belgíski miðvörðurinn Koni De Winter er kominn á lánssamningi frá Juventus en hann er 21 árs gamall og lykilmaður í U21 landsliði Belgíu.

Þá er Genoa einnig búið að krækja í bakvörðinn Aarón Martín frá Mainz í þýsku deildinni og markvörðinn Josep Martinez frá RB Leipzig, auk þess að festa kaup á George Puscas frá Reading.

Talið er að Genoa vanti einn miðjumann og einn varnarmann til að fullkomna leikmannahópinn sinn.