Starfslýsingin hljóðar svona: „Sviðsstjóri knattspyrnusviðs vinnur að því að efla faglega þekkingu og framþróun á knattspyrnusviði sambandsins þannig að sviðið standist alþjóðlegan samanburð. Sviðsstjóri hefur auk þess umsjón með markmiðasetningu því tengdu og vinnur að þróun afreksstefnu sambandsins."

Arnar Þór Viðarsson hefur gegnt þessu starfi frá því það var fyrst mótað hjá KSÍ. Hann tók við því fyrst árið 2019.

Þegar Arnar tók við sem landsliðsþjálfari karla í desember 2020 þá var það ljóst að hann gæti ekki gegnt starfi yfirmanns fótboltamála áfram.

Klara Bjartmarz, framkvæmdastjóri KSÍ, segir í svari við fyrirspurn Fótbolta.net að fjórar umsóknir hafi borist sambandinu en ekki er opinberað hvaða einstaklingar það voru sem sóttu um.

„Við tökum okkur þann tíma sem þarf til að vinna málið áfram, s.s. ekkert ákveðið með hvenær verður ráðið," sagði Klara jafnframt.

Jörundur Áki sótti um en Rúnar og Óli ekki
Það hafa nokkrir aðilar verið orðaðir við starfið upp á síðkastið, en þar á meðal eru Jörundur Áki Sveinsson, Ólafur Kristjánsson og Rúnar Kristinsson. Fótbolti.net hafði samband við þá þrjá varðandi þetta starf í dag.

Jörundur Áki staðfesti í dag að hann hefði sótt um starfið, en hann hefur starfað fyrir KSÍ síðustu árin sem þjálfari í yngri landsliðum.

Rúnar vildi ekki tjá sig um sögurnar í lok síðasta mánaðar en hann sagði í samtali við Fótbolta.net í dag að hann hefði ákveðið að sækja ekki um starfið. Sömu sögu er að segja um Óla Kristjáns sem hefur starfað sem yfirmaður fótboltamála hjá Breiðabliki síðustu mánuði.

Sjá einnig:
Þau koma til greina í starf yfirmanns fótboltamála