KSÍ auglýsti starf yfirmanns fótboltamála á vefsíðu sinni á dögunum en Arnar Þór Viðarsson, þjálfari karlalandsliðsins, hefur gegnt stöðunni til þessa.

Umsóknarfrestur er til og með 15. september 2022, en á meðal hæfniskrafna er að umsækjendur séu með UEFA PRO gráðu og þekkingu á íslenskum fótbolta. Við það minnkar listinn til muna en það eru 45 manns skráð með PRO þjálfaragráðu í kerfinu hjá KSÍ.

Rúnar Kristinsson er á þeim lista og hefur verið orðaður við starfið. Hann hefur áður starfað sem yfirmaður fótboltamála hjá KR og þekkir því verklagið nokkuð vel.

„Nei, ég hef ekki heyrt það. Það getur vel verið að einhver orði mig við það en þeir verða að eiga það við sig sjálfir sem segja það," sagði Rúnar við Fótbolta.net.

Þegar hann var spurður að því hvort hann hefði áhuga á að taka við þessu starfi þá vildi hann ekki tjá sig um það.

„Ég ætla ekki að tjá mig um það að svo stöddu. Ég á eitt ár eftir hjá KR og er ekkert að spá í þessu. Það er nægur tími til stefnu og umsóknarfrestur rennur út einhverntímann um miðjan september þannig ég er ekkert farinn að huga að einu né neinu núna," sagði Rúnar.