Sif: Mamma mætir

„Það er sérstakt fyrir mig að koma hingað í fæðingarlandið“ sagði Sif sem er fædd í Þýskalandi og bjó þar fyrstu ár ævi sinnar. Faðir hennar, Atli Eðvaldsson, lék sem atvinnumaður í Þýskalandi í tæpan áratug og Sif var því barnung þegar hún fékk smjörþefinn af þýska boltanum.

„Pabbi var að spila í Fortuna Dusseldorf og við Egill bróðir erum fædd hérna. Þetta eru því svolítið gamalkunnar slóðir.“

„Maður hefur alltaf haldið með þýska landsliðinu á stórmótum. Svo loksins komst Ísland inn og maður gat farið að halda með einhverjum öðrum en Þjóðverjunum,“ sagði Sif sem þekkir fótboltaþjóðin þó ekki einungis i gegnum uppvaxtarárin því hún lék með Saarbrücken í þýsku Bundesligunni á árunum 2010-2011. Við spurðum Sif út í tímann hjá Saarbrücken.

„Ég held að það hafi bætt mig sem varnarmann. Ég fer úr Val sem voru meistarar á þeim tíma og fer í lið sem ég vissi að var ekki tæknilega eins gott og Valur. Við vorum lið sem héldum okkur uppi fyrsta hálfa árið mitt og svo vorum við að ströggla á botninum. Að fá að spila á móti þýskum landsliðsmönnum í hverri viku gerði mig að betri leikmanni. Ég er ótrúlega þakklát fyrir góða, erfiða en alveg frábæra tíma með Saarbrücken.“

Búist er við nokkrum þúsundum þýskra stuðningsmanna á leikinn á eftir en síðdegis í gær höfðu ríflega 3.500 miðar verið seldir. Sif segir sérstaka stemmningu í kringum þýska liðið og þeirra stuðningsmenn.

„Aðdáendurnir í kringum þýska liðið eru mjög harðir aðdáendur. Þeir mæta og fylgja liðinu sínu. Ég held við séum að fara að upplifa sérstaka stemmningu. Að vera með 10.000 manns á vellinum sem eru bara að hvetja sitt lið áfram. Svo erum við kannski með 2-3 foreldra. Ég veit að mamma er að fara að mæta,“ sagði Sif en var þó ekki viss um að mamma sín myndi leggja í að stýra víkingaklappinu fræga á Brita-leikvanginum.

Sjáðu allt viðtalið við Sif í spilaranum fyrir ofan en þar ræðir hún nánar um dvölina í Þýskalandi, einkenni þýska liðsins og ýmislegt fleira.