Króatíski miðjumaðurinn Luka Modric er búinn að kveðja Toni Kroos eftir tíu ár saman hjá Real Madrid.
Kroos tilkynnti á dögunum að hann væri búinn að ákveða að leggja skóna á hilluna en hann er 34 ára gamall og kom við sögu í 46 leikjum á frábæru tímabili hjá Real Madrid.
Tilkynning hans kom mörgum í opna skjöldu og hefur kveðjuskilaboðum rignt yfir Kroos.
Kroos og Modric léku saman á einni öflugustu miðju heimsfótboltans auk þess að vera algjörir lykilmenn í sterkum landsliðum Þýskalands og Króatíu.
„Það er mjög erfitt að skrifa þessi orð. Fótboltaheimurinn er sorgmæddur vegna þess að sögulegur leikmaður er að leggja skóna á hilluna og ég er einnig mjög sorgmæddur. Þú ert goðsögn í fótboltaheiminum og goðsögn hjá Real Madrid," skrifaði Modric á Instagram.
„Ég naut þess virkilega að spila við hlið þér á miðjunni hjá Real Madrid, þú hefur hæfileika sem eru einstakir - það mun aldrei vera neinn annar Toni Kroos í fótboltaheiminum. Saman upplifðum við ógleymanleg kvöld í Meistaradeildinni og á Bernabéu. Við munum aldrei gleyma þessum stundum.
„Þú afrekaðir allt sem þú gast afrekað hérna. Ég mun sakna þín kæri vinur."
Athugasemdir
