Þór/KA fékk Stjörnuna í heimsókn í undanúrslitum Lengjubikars kvenna í Bogann í kvöld. Liðin kepptust um að mæta Breiðabliki í úrslitum.

Heimakonur voru líklegri í fyrri hálfleik og Margrét Árnadóttir sá til þess að liðið var með forystuna þegar flautað var til hálfleiks.

Stjörnukonur komu sterkari út í seinni hálfleikinn og þær jöfnuðu metin eftir tæplega klukkutíma leik þegar Hrefna Jónsdóttir skallaði boltann í netið eftir darraðadans inn á teignum.

Staðan var jöfn eftir 90 mínútur og grípa þurfti því til vítaspyrnukeppni. Bæði lið skoruðu úr tveimur fyrstu spyrnunum en Hrefna skaut í slá í þriðju spyrnu Stjörnunnar og Fanney Lísa Jóhannesdóttir skaut framhjá í fjórðu spyrnunni. Það var svo Hulda Björg Hannesdóttir sem tryggði Þór/KA sigurinn þegar hún skoraði úr fjórðu spyrnu Þór/KA.

Þór/KA mætir Breiðabliki í úrslitum á föstdagskvöldið. Þess má geta að landsliðskonan Sandra María Jessen var ekki með Þór/KA í kvöld vegna veikinda.

Þór/KA Jessica Grace Berlin (m), Hulda Björg Hannesdóttir, Angela Mary Helgadóttir, Kolfinna Eik Elínardóttir, Hildur Anna Birgisdóttir, Kimberley Dóra Hjálmarsdóttir, Karen María Sigurgeirsdóttir, Sonja Björg Sigurðardóttir, Margrét Árnadóttir, Bríet Jóhannsdóttir, Hulda Ósk Jónsdóttir
Varamenn Ísey Ragnarsdóttir, Amalía Árnadóttir, Emelía Blöndal Ásgeirsdóttir, Eva S. Dolina-Sokolowska, Anna Guðný Sveinsdóttir, Emelía Ósk Kruger, Harpa Jóhannsdóttir (m)

Stjarnan Vera Varis (m), Anna María Baldursdóttir, Arna Dís Arnþórsdóttir, Jakobína Hjörvarsdóttir, Eyrún Embla Hjartardóttir, Úlfa Dís Kreye Úlfarsdóttir, Ingibjörg Lúcía Ragnarsdóttir, Birna Jóhannsdóttir, Hrefna Jónsdóttir, Jessica Ayers, Gyða Kristín Gunnarsdóttir
Varamenn Henríetta Ágústsdóttir, Hulda Hrund Arnarsdóttir, Fanney Lísa Jóhannesdóttir, Margrét Lea Gísladóttir, Andrea Mist Pálsdóttir, Sandra Hauksdóttir, Tinna María Heiðdísardóttir (m)