Sandra Sigurðardóttir, markvörður Vals sagði tilfinninguna vera mjög góða eftir 1-0 sigur á Breiðablik í kvöld.
„Þetta er náttúrulega klárlega það sem við ætluðum, að ná í 3 stig. Það er alltaf erfitt að koma á Kópavogsvöll og þetta var bara hörkuleikur og ég er bara mjög sátt," sagði Sandra strax eftir leik.
Lestu um leikinn: Breiðablik 0 - 1 Valur
Það var nóg að gera hjá Söndru í dag, en hún varði nokkrum sinnum gríðarlega vel og kórónaði leik sinn með því að verja vítaspyrnu á 83. mínútu.
„Maður tekur svolítið sénsinn, reynir að lesa spyrnumanninn og það tókst bara vel í dag og ég er bara ótrúlega ánægð með það."
Miðvörðurinn Arna Sif skoraði sigurmark leiksins eftir hornspyrnu, en hún hefur verið drjúg fyrir Valskonur í hornspyrnum í sumar.
„Þetta er bara geggjað sko, ótrúlega sátt með hana og óska mótherjum okkar bara góðs gengis að verjast henni af því að hún er náttúrulega bara algjört naut sko og bara ótrúlega góð í þessu, þær báðar, líka Mist og svo erum við með fleiri góða skallamenn sko. Þannig þetta er alveg vopn, alveg klárlega," sagði Sandra.
Viðtalið í heild má sjá í spilaranum að ofan.
