Óskar Hrafn: Við þurfum að vinna okkur inn réttinn til að skora á þá

Hversu ánægður ertu með sigurinn gegn Breiðabliki í dag?

„Bara sáttur með að við skyldum klára þennan leik á þennan hátt. Við tryggðum okkur 2. sætið í síðasta leik og maður vissi ekki alveg hvernig menn myndu mæta til leiks. Mér fannst við gera þetta virkilega vel. Við vorum aðeins kærulausir á köflum en sköpuðum okkur fullt af færum og hefðum jafnvel getað skorað fleiri mörk.“

Aron bætti markametið í dag. Það er stórkostlegur árangur, ekki satt?

„Jú, það er ekkert minna en hann á skilið eftir þetta tímabil. Hann er búinn að vera frábær og hefur beðið svolítið eftir þessum tveimur mörkum. Það var gaman að sjá þau koma í dag. Án þess að gera lítið úr fyrra metinu þá er þetta enn stærra afrek miðað við fjölda leikja gegn bestu liðunum. Frábært fyrir hann og félagið.“

Fannar Heimisson skoraði sitt fyrsta mark í meistaraflokki og þakkaði þér traustið að fá að byrja leikinn.

„Fannar hefur verið virkilega góður undanfarið og tekið gríðarlega stór skref. Ég hafði ekki eina einustu áhyggju af því að láta hann byrja þennan leik. Hann var virkilega flottur og er gríðarlegt efni. Við fáum að njóta krafta hans fram í byrjun júlí á næsta ári og það er frábært.“

Þið endið í öðru sæti. Er raunhæft að stefna á Íslandsmeistaratitilinn á næsta tímabili?

„Þegar þú endar í öðru sæti er rökrétt að stefna hærra. En við verðum að átta okkur á því að við erum að berjast við Víkinga sem við höfum ekki náð að vinna í fimm leikjum á síðustu tveimur árum. Við þurfum að bæta okkur líkamlega, andlega og fótboltalega til að nálgast þá. Við þurfum líka að tryggja að byrjunin á næsta tímabili verði eins góð og mögulegt er og vinna okkur inn réttinn til að skora á þá um titilinn. Það verður gríðarleg vinna í vetur.“