FH íhugaði að fá handboltalandsliðsmanninn Aron Pálmarsson til að vera varamarkvörður í 3 - 2 sigrinu á Val í dag en hann spilaði í marki í 2. flokki FH þar til hann fór á fullt í meistaraflokki í handbolta.
Sindri Kristinn Ólafsson aðalmarkvörður FH er meiddur og gat ekki tekið þátt í dag. Daði Freyr Arnarsson leysti stöðuna en þá vantaði mann á bekkinn. Rætt var að fá Aron en ekkert varð úr því svo á endanum var Sindri skráður varamarkvörður þó hann væri ekki leikhæfur.
Lestu um leikinn: FH 3 - 2 Valur
„Glugginn er lokaður og Aron Pálmarsson er í FH. Það var búið að viðra þetta en meira í gríni en alvöru," sagði Sigurvin Ólafsson aðstoðarþjálfari FH eftir leikinn í dag.
Undirbúningstímabilið er að hefjast í handboltanum og Aron spilaði með FH gegn Haukum í jafnteflisleik fyrir framan 400 áhorfendur í hádeginu í dag. Aðspurður hvort það hafi stoppað á einhverju eða hvort þetta hafi bara verið grín sagði Venni.
„Þetta var pæling en þannig lagað er þetta vitleysa. Þetta er handboltamaður sem er að fara að byrja tímabil með klístrið," sagði hann.
Orðrómur var um að FH hafi reynt að fá Aron en að Sigursteinn Arndal þjálfari handboltaliðsins hafi sett stopp. Er eitthvað til í því? „Þú verður að spyrja hann að því, ég þekki það ekki alveg. Þetta var ekki þannig alvara í þessu en þetta var bara pæling því glugginn er lokaður og Sindri meiddist."