Framarar tilkynntu í dag að Stefán Þór Hannesson hefði framlengt samning sinn við félagið. Samningurinn er til tveggja ára en hann mun leika á láni hjá Ægi í sumar.
Stefán verður 27 ára í mars. Hann kom til Fram frá Hamri fyrir tímabilið 2021. Í yngri flokkunum lék hann með sameiginlegu liði Hamars og Ægis.
Stefán verður 27 ára í mars. Hann kom til Fram frá Hamri fyrir tímabilið 2021. Í yngri flokkunum lék hann með sameiginlegu liði Hamars og Ægis.
„Ægir endaði í þriðja sæti annarrar deildar síðastliðið sumar og er ljóst að Stefán er að fara í mikla baráttu í sumar. Stutt er að renna í Þorlákshöfn fyrir áhugasama Framara sem vilja fylgjast með okkar manni í sumar," segir í tilkynningu Fram.
„Það verður fyrst og fremst mikill söknuður af Stefáni, enda alltaf mikil lífsgleði og stemning í kringum hann. Stefán, eins og allir fótboltamenn, vildi spila fleiri leiki og er á leiðinni í skemmtilega en krefjandi deild. Við vonum að honum muni ganga mjög vel í sumar og verður gaman að fylgjast með," sagði Agnar Þór Hilmarsson, formaður knd. Fram í tilkynningu félagsins.
Í tilkynningu Ægis segir eftirfarandi: „Stefán er sunnlendingur mikill og uppalinn hjá grönnum okkar í Hveragerði, fór til Fram fyrir sumarið 2021 og verið þar síðan.
Stefán kemur með mikla samkeppni um markvarðarstöðuna og er mikilvægur fengur í baráttunni framundan í 2. deildinni."
Athugasemdir