Þyrla eiganda Leicester brotlenti fyrir utan King Power leikvanginn

Þyrla Vichai Srivaddhanaprabha, eiganda Leicester City hrapaði nú rétt í þessu fyrir utan heimavöll liðsins, King Power leikvanginn eftir leikinn gegn West Ham. Allt er í ljósum logum.

Atvikið gerðist á bílaplani rétt fyrir utan leikvanginn en sjónarvottar segja að mikinn reyk leggi nú yfir svæðið og sjúkrabílar og lögreglubílar séu í aðalhlutverki á svæðinu.

Sjónarvottur segist hafa séð þegar þyrlan snérist stjórnlaus í hringi í loftinu áður en hún hrapaði á bílaplanið með miklum látum.

Srivaddhanaprabha er vanur því að mæta á leiki í þyrlu sem svo lendir á miðjum vellinum eftir leiki og flytur hann burt. Sagt er að hann hafi verið um borð þegar þyrlan hrapaði í kvöld.

Srivaddhanaprabha er Tælendengur og hann eignaðist Leicester 2010 en á eigendatíð hans varð félagið óvænt Englandsmeistari 2016.

Fótbolti.net færir frekari fréttir um leið og þær berast en engar yfirlýsingar eru komnar varðandi málið.