Lengjudeild kvenna: Augnablik sigraði Hauka

Augnablik er komið upp í sjötta sæti Lengjudeildarinnar eftir sigur á heimavelli gegn botnliði Hauka.

Margrét Brynja Kristinsdóttir kom Augnablik yfir snemma leiks með marki úr vítaspyrnu og leiddu Kópavogsstúlkur í hálfleik.

Haukum gekk illa að skapa sér færi og tvöfaldaði Viktoría París Sabido forystu heimakvenna með marki á 72. mínútu.

Sex mínútum síðar fékk Rakel Leósdóttir rautt spjald í liði gestanna og tókst tíu Haukum ekki að koma til baka.

Augnablik er með níu stig eftir níu umferðir. Haukar eru með þrjú stig.