Lögreglan vill ná tali af Grealish vegna umferðaróhapps

Enskir fjölmiðlar greina frá því í kvöld að lögreglan í Birmingham bíði eftir því að ná tali af ökumanni á hvítum Range Rover sem klessti á tvo kyrrstæða bíla fyrir hádegið í dag.

Ökumaðurinn er talinn hafa verið Jack Grealish. Mynd af Grealish nálægt staðnum sem atvikið átti sér stað gengur nú á milli manna á samfélagsmiðlum, þessi mynd þykir ýta frekar undir það að þarna hafi Grealish verið að verki.

Í tilkynningu frá lögreglunni í Birmingham segir: „Ökumaðurinn skildi eftir upplýsingar hjá almennum borgara á vettvangi áður en hann gekk í burtu, lögreglan mun ræða við hann. Minni háttar skemmdir eru á ökutækjunum og lögreglan rannsakar nú málið, ef einhver býr yfir upplýsingum um atvikið er viðkomandi beðinn um að hafa samband."

Aston Villa er nú að reyna ná í Grealish sem er fyrirliði liðsins en hann svarar engum símtölum og ekki er vitað hvar hann er niðurkominn.