Lengjudeild kvenna: Víkingur spilar í Bestu deildinni næsta sumar (Staðfest)

Víkingur tryggði sér sigur í Lengjudeildinni og þar með sæti í Bestu deildinni með sigri á Fylki í kvöld.

Það var mikið fjör í fyrri hálfleiknum en aðeins eitt mark leit dagsins ljós. Það var Nadía Atladóttir sem skoraði það fyrir Víking eftir hornspyrnu frá Bergdísi Sveinsdóttur en Mist Rúnarsdóttir sem textalýsti leiknum hér á Fótbolti.net taldi jafnvel að Bergdís hafi átt markið.

Eva Rut Ásþórsdóttir jafnaði fyrir Fylki með marki beint úr aukaspyrnu snemma í síðari hálfleik.

Nadía var ekki lengi að ná forystunni aftur og Linda Líf Boama skoraði þriðja mark Víkings í kjölfarið. 

Fylkisstúlkur gáfust ekki upp og Eva Rut minnkaði muninn en það var svo Sigdís Eva Bárðardóttir sem gulltryggði Víkingi sigurinn og bikarmeistararnir munu því leika í Bestu deildinni á næstu leiktíð.