Hallbera Guðný Gísladóttir á æfingu Íslands í dag.
Hallbera Guðný Gísladóttir vonast til að íslenska landsliðið geti klárað árið með stæl er liðið mætir Kýpur í undankeppni HM annað kvöld.
Hallbera byrjaði á bekknum í 2-0 sigri Íslands á Japan í æfingaleik á dögunum en hún skilur þó vel að aðrir leikmenn fái sénsinn.
„Ég er alltaf svekkt þegar ég fæ ekki að byrja leiki en ég held að allir séu þannig gerðir að þeir vilja spila eins mikið og hægt er. Ég skil það líka óskaplega vel að það eru fleiri að berjast um stöður í liðinu og það þarf að auka breiddina og núna er að koma sér aftur í liðið."
Ísland, sem er í 2. sæti riðilsins með 6 stig er búið að spila þrjá leiki en liðið vann Kýpur í fyrri leiknum, 5-0. Hallbera gerir kröfu á sigur á morgun.
„Spennandi að fá að klára langt tímabil í hitanum á Kýpur. Ég held að við getum sett kröfu á sigur og klára þennan leik með stæl og tímabilið með stæl," sagði Hallbera en viðtalið má sjá í heild sinni hér fyrir ofan.
