Guðni Eiríksson, þjálfari FH
Guðni Eiríksson, þjálfari FH, var að vonum sáttur eftir að FH sigraði Fram sannfærandi 6-2 í dag í 7. umferð Bestu Deildar kvenna.
Lestu um leikinn: FH 6 - 2 Fram
„Eins og alltaf eftir sigurleiki, þá líður mér mjög vel. Leikurinn var kaflaskiptur hjá FH, við vorum slök á mörgum sviðum í fyrri hálfleik. Við fórum svo vel yfir hlutina í hálfleik, gerðum breytingar og allir stigu upp.''
Eins og Guðni sagði, fannst honum leikurinn kaflaskiptur, en eftir að Nia Raisa kom inná breyttist leikurinn algjörlega og hún skoraði þrennu.
„Þegar Nia er á sínum degi þá er gríðarlega mikilvægt að hafa hana. Þetta er vonandi það sem koma skal hjá henni. Hún sýndi þá takta sem við vitum að býr í henni og ég er viss um að þetta er eitthvað sem hún mun byggja ofan á í næstu leikjum.''
Ingibjörg Magnúsdóttir átti annan stórleik í röð, en hún var valinn maður leiksins. Hún náði tveimur stoðsendingum, skoraði fyrsta mark FH og fiskaði vítið sem Nia kláraði þrennuna sína úr. Hún var valin sterkust í 6. umferð eftir 2-3 sigur gegn Breiðablik.
„Ég kenndi henni þetta allt í 8. flokki. Sjálfstraustið hennar er upp í himinskautum og það er helvíti góður kokteill þegar leikmaður hvort hann sé ungur eða gamall sé með þetta sjálfstraust og gæði í ofanálag.''
Það hefur verið mikið ritað og rætt um framtíð Ingibjargar, og þá hvort hún muni jafnvel fara út í atvinnumenskuna eftir þetta tímabil.
„Ingibjörg mun alltaf fara út í atvinnumennsku og það er skýr stefna FH að hún verði atvinnumaður uppalin úr FH þegar tíminn er réttur.''
Eftir þessa umferð er tveggja vikna frí, en næsti leikur FH verður 13. júní gegn Víkingi á Víkingsvelli.
Viðtalið má sjá í heild sinni í spilaranum fyrir ofan.
