Massengo þrettándi inn hjá Burnley (Staðfest)
Mynd: Getty Images
Mynd: Getty Images
Burnley hefur farið mikinn á leikmannamarkaðinum í sumar og var að krækja í Han-Noah Massengo á frjálsri sölu frá Bristol City, en hann er þrettándi leikmaðurinn til að skrifa undir hjá meistaraflokki í sumar.
Massengo er 22 ára gamall Frakki og spilar sem varnarsinnaður miðjumaður. Hann á 110 leiki að baki á þremur og hálfu ári í Bristol og 24 leiki fyrir yngri landslið Frakka.
Massengo gerir fjögurra ára samning við nýliða Burnley sem eru meðal annars búnir að næla sér í Sander Berge, James Trafford og Aaron Ramsey í sumar.
Vincent Kompany er við stjórnvölinn hjá Burnley og viðurkennir Massengo að samræður við hann hafi auðveldað honum að taka ákvörðunina.
Massengo segist vera spenntur að reyna fyrir sér í deild þeirra bestu, en Burnley er án stiga eftir tvo fyrstu deildarleikina.
Jóhann Berg Guðmundsson er einnig hjá Burnley og lék allan leikinn í fyrsta sigri tímabilsins sem kom er liðið heimsótti Nottingham Forest í deildabikarnum á dögunum.
