Wayne Rooney, leikmaður Everton, var gestur í þættinum Monday Night Football á Sky Sports í gær. Hann var þar sérfræðingur ásamt Jamie Carragher, fyrrum leikmanni Liverpool.

Rooney þótti standa sig afskaplega vel í nýju hlutverki; hann hefur fengið mikið lof fyrir frammistöðu sína.

Blaðamaðurinn Sachin Nakrani skrifar skemmtilegan pistil í Guardian í dag þar sem hann segir að Rooney hafi sannað það í þættinum að hann sé gáfaðari en margir halda.

Rooney setti tóninn strax þegar hann skaut á kollega sinn Carragher.

„Það er frábært að vera hérna og ef ég á að vera hreinskilinn þá er þetta líklega það næsta sem Carragher hefur komist í að ná mér," sagði Rooney og uppskar hlátur.