Lestu um leikinn: Víkingur R. 2 -  0 Stjarnan

Helgi gat ekki beðið um betri byrjun á tímabilinu en hann lagði upp fyrsta mark deildarinnar fyrir færeyska varnarmanninn Gunnar Vatnhamar áður en hann tvöfaldaði síðan sjálfur forystuna með góðu marki tuttugu mínútum fyrir leikslok.

„Þvílík negla maður! Þetta var alvöru negla hjá honum og gott að sjá hann inni,“ sagði Helgi er hann var spurður út í fyrsta mark Íslandsmótsins.

Helgi er ánægður með að fá traustið í byrjunarliðinu og stefnir hann á að nýta hvert einasta tækifæri.

„Ánægjulegt. Það er bara að nýta sénsinn og reyna að halda áfram. Mér er búið að ganga vel í vetur og finnst ég vera í hörkustandi, þannig já aðeins nær og það er bara að halda áfram.“

Víkingsliðið átti nokkra hættulega sénsa en Stjarnan náði að vinna sig betur inn í leikinn áður en annað markið kom.

„Mér fannst við sterkari aðilinn í kvöld og fengum töluvert betri færi að mínu viti en maður veit aldrei. Það er 1-0 og svo getur eitt dottið úr horni og þeir skjóta í stöngina einu sinni. Þetta er fljótt að breytast en fannst við vera með 'control' á leiknum.“

„Þeir voru aðeins byrjaðir að liggja á okkur og farnir að ógna meira við miðbik seinni hálfleiks. Það var geðveikt að ná inn öðru markinu og síðan klára að sigla þessu heim eins og við kunnum.“

Valdimar Þór Ingimundarson kom frá Sogndal fyrir tímabilið en hann lagði upp markið á Helga í leiknum.

„Hann er ógeðslega góður að snúa á menn. Þetta er hans styrkleiki og maður veit að þegar hann er búinn að snúa á menn þá er það bara að 'gönna' í gegn.“

„Maður er fínn á vinstri og vinstri fótur í vinstra horn klikkar sjaldan. Þetta er bara 'instinct' og fyrsta sem þér dettur í hug og 'go for it'.“