Eftir tap í fyrstu þremur leikjum Lengjubikarsins náði Fjölnir að vinna 5-2 sigur gegn Leikni R. í Lengjubikarnum í kvöld.
„Eftir fjóra tapleiki í röð er gott að fá loksins sigur. Við ætluðum að spila einfaldan fótbolta og það tókst á köflum, mér fannst við bestir þegar við gerðum það," sagði Ágúst Gylfason, þjálfari Fjölnis.
„Ég vona að við séum búnir að taka dýfuna, vonandi er þetta upp á við núna og við toppum á réttum tíma þegar Íslandsmótið byrjar."
Þórir Guðjónsson skoraði þrennu fyrir Fjölnisliðið í kvöld.
„Hann með þrennu og Marcus (Solberg) með tvennu, svo senterarnir skoruðu þrennu í dag. Það er gott fyrir okkur. Þeir verða bara betri þegar nær dregur."
Þórður Ingason, aðalmarkvörður Fjölnis, hefur ekkert spilað á undirbúningstímabilinu vegna meiðsla.
„Við erum farnir að sjá hann á æfingum og hann er farinn að komast í takkaskó. Hann fór í aðgerð á il í febrúar. Hann getur æft eitthvað með okkur í æfingaferðinni í næstu viku. Þetta lítur allt vel út," sagði Ágúst.
Tveir ungir Fjölnismenn eru úti hjá Tromsö á reynslu og nýlega samdi Viðar Ari Jónsson við Brann í Noregi. Fjölnismenn hika ekki við að hleypa sínum mönnum út.
„Það er draumur allra leikmanna að komast út og við viljum ekki stöðva það. Þessir strákar koma vonandi til baka þegar þeir enda ferilinn," sagði Ágúst en viðtalið má sjá í heild í sjónvarpinu hér að ofan.
Athugasemdir