Auðun neitar að hafa tekið leikmann hálstaki - „Fer reglulega inn á völlinn með þann ásetning að meiða“

Auðun segir við 433.is að hann sé orðinn þreyttur á framkomu Sigurðar í leikjum og segir hann mæta inn á völlinn með þann ásetning að meiða.

„Ég hef ekki þekkt hann í mörg ár en hef séð hann spila fótbolta í tvö ár. Hann er einn af þessum leikmönnum sem fer mjög reglulega inn á völlinn með þann ásetning að meiða andstæðinginn. Það gerir hann í gær í þrígang og endar með því að hann fer með olnbogann í andlitið á leikmanni okkar og nefbrýtur hann,“ segir Auðun.

Eftir leik segist Auðun hafa ætlað að þakka Sigurði fyrir leikinn en jafnframt láta hann vita að framkoma hans hefði verið óboðleg. Hann segir að sér hafi verið heitt í hamsi, en að hann hafi verið rólegur þegar hann tók utan um Sigurð og sagði honum sína skoðun.

„Ég held utan um hann og hann sagði mér að halda kjafti eða eitthvað, eins og menn segja í hita leiksins. Þá festist takkaskórinn hans í reimunum mínum og ég gríp fastar utan um hann, þetta var klaufalegt.“

„Leikmenn koma svo á milli og þá verður einhver svona dramatík, en gott og vel. En ef hann er með einhverja áverka er það ekki því ég tók hann hálstaki. Ég tek algjörlega fyrir að hafa tekið hann hálstaki,“ segir Auðun jafnframt.

433.is greinir jafnframt frá því að málið sé komið á borð Aga- og úrskurðarnefndar KSÍ.