Bjarni setur stefnuna á Pepsi-deildina.
Í spilaranum hér að ofan má heyra viðtal við Bjarna Jóhannsson, þjálfara KA, úr útvarpsþættinum Fótbolti.net í gær. Byrjað var að ræða við Bjarna um Jóhann Helgason sem gekk í raðir félagsins í liðinni viku.
„Það er frábært að fá hann. Okkur veitir ekki af reynslumiklum mönnum í þennan hóp okkar í dag. Jói er fæddur og uppalinn KA-maður og það er mjög traust að fá svona menn til baka," segir Bjarni en miklar breytingar eru á liði KA.
„Við erum að taka nýja stefnu í þessu og erum að byggja upp nýtt og ungt lið. Við ætlum að fara hægt í málin þegar við skoðum nýja menn. Við ætlum að reyna að fá meiri gæði í þessa menn sem við erum að fá til félagsins og taka þá gæðin fram yfir magnið. Við eigum fullt af fínum strákum en ég tel að menn eigi að stíga á bremsuna í útlendingavæðingunni."
„Það eru sextán leikmenn horfnir á braut síðan í haust svo það eru gríðarlega miklar breytingar á hópnum hjá okkur en á móti kemur eigum við marga leikmenn í yngri landsliðum. Það eru spennandi árgangar að koma upp og það verður að gefa þeim mínútur."
KA hafnaði í sjötta sæti 1. deildarinnar í fyrra en stefnan er sett upp í Pepsi-deildina.
„Það verður alltaf að vera markmiðið að fara upp. Klúbbur eins og KA á að vera í efstu deild. Þess vegna megum við ekki missa sjónar á því að við ætlum upp og setjum þá pressu á okkur," segir Bjarni Jóhannsson.
