Þjálfarinn samþykkir sáttafund með Ronaldo

Ronaldo yfirgaf herbúðir portúgalska landsliðsins á dögunum eftir að hafa setið allan tímann á bekknum gegn Noregi í Þjóðadeildinni.

Samkvæmt heimildum nálægt honum ætlaði hann að hætta með landsliðinu eftir heimsmeistaramótið en Jesus og portúgalska fótboltasambandið sannfærðu hann um að hann hefði enn mikilvægu hlutverki að gegna.

Þeir áttu að hafa samið um að Ronaldo spilaði báða heimaleikina en fengi hvíld í útileikjunum. Jesus sagðist þó þurfa á honum að halda gegn Noregi en hafði hann á bekknum og lét hann hita upp án þess að gefa honum mínútu.

Ronaldo taldi þjálfarann hafa brotið samkomulagið og yfirgaf hópinn í kjölfarið.

Þeir eiga síðan að hafa rætt saman og Jesus átt að biðja Ronaldo afsökunar á fréttamannafundi en það gerði hann ekki. Samband þeirra er því sagt í molum og Ronaldo íhugar alvarlega að hætta með landsliðinu.

Samkvæmt A Bola hefur portúgalska fótboltasambandið nú sannfært Jesus um að setjast niður með honum á sáttafundi en Ronaldo hefur ekki enn ákveðið hvort hann þiggur það.

Jesus og sambandið hafa sætt mikilli gagnrýni fyrir framkomuna gagnvart Ronaldo og henni hefur verið mótmælt á götum Lissabon og víðar.

Óánægjan er einnig farin að gera vart við sig innan landsliðshópsins þótt Portúgal hafi unnið bæði Noreg og Danmörku án hans. Liðið mætir Norðmönnum á ný á morgun í síðasta leik verkefnisins.