Hannes er klár í slaginn fyrir leikinn gegn Albaníu á laugardaginn.
Hannes ásamt Aroni Einari Gunnarssyni landsliðsfyrirliða fyrir leikinn gegn Belgum í Þjóðadeildinni í nóvember.
„Það hefur gengið á ýmsu hjá okkur og við höfum byrjað þetta hrikalega svo það er fínt fyrir mig og allt liðið að komast aðeins frá núna, hreinsa hausinn og einbeita okkur að öðru," sagði Hannes Þór Halldórsson fyrir landsliðsæfingu á Laugardalsvelli í dag en hann ver í sumar mark Vals sem hefur byrjað illa á Íslandsmótinu og situr í botnsætinu eftir fyrsta þriðjung mótsins.
„Ég hef reynslu af þessu frá mínum félagsliðum eins og Randers þar sem var bölvað ströggl á okkur og á löngum köflum gekk lítið. Þá var alltaf gott að koma í landsliðið og yfirleitt vinna leikina."
Ísland mætir Albaníu á Laugardalsvelli klukkan 13:00 á laugardaginn og svo Tyrkjum hér heima líka 18:45 á þriðjudaginn.
„Þetta eru góð lið og Tyrkirnir á betri stað en þeir hafa verði þegar við höfum mætt þeim síðustu ár. Albanirnir eru með fullt af flottum fótboltamönnum svo þetta verða hörkuleikir og mjög erfiðir en við stefnum á að vinna. Þetta eru heimaleikir og hér höfum við verið virkilega sterkir. Ef við ætlum að gera eitthvað í þessum riðli eru þetta leikir sem þurfa að vinnast."
Ísland hefur leikið tvo leiki í undankeppni EM 2020 til þessa, sigur í Andorra og tap gegn heimsmeisturum Frakka. Sigur í leikjunum núna færi með liðið í 9 stig úr fyrstu fjórum leikjunum sem væri sterkt.
„Þetta hefur verið á pari eftir fyrsta verkefnið og viðbúið hvernig það fór. Hér sjáum við lykilinn að riðlinum. Þessir heimaleikir geta komið öllu í gang, komið okkur í góða stöðu í riðlinum og kveikt í öllu batterýinu. Svipað og gerðist eftir að við náðum í 6 stig gegn Finnum og Tyrkjum í HM riðlinum. Við þurfum það aftur, tvo góða leiki hérna og 6 stig. Þá hef ég trú á að við finnum taktinn og springum út."
Erik Hamren landsliðsþjálfari gaf Hannesi traustsyfirlýsingu fyrir síðasta verkefni gegn Andorra og Frökkum í mars og sagði hann fyrsta markvörð liðsins. Hann neitaði að gera það núna.
„Það pirrar mig ekkert. Það hefur ekki verði venjan hingað til fyrir utan þetta síðasta verkefni að gefa út traustsyfirlýsingu og ég bjóst ekki við að það yrði gefin út stuðningsyfirlýsing. Það truflar mig ekkert og ég undirbý mig bara eins og vanalega. Ég er klár í þetta á laugardaginn."
Í viðtalinu að ofan er nánar rætt við Hannes um stöðuna hjá Val sem situr í botnsæti Pepsi Max-deildarinnar með 4 stig eftir fyrstu 7 umferðirnar en liðið er Íslandsmeistari síðustu tveggja ára.
Athugasemdir
