Rúnar Páll Sigmundsson.
Brynjar Björn Gunnarsson.
Rúnar Páll Sigmundsson, þjálfari Stjörnunnar, segir að Brynjar Björn Gunnarsson hafi komið fyrstur upp í hugann þegar hann var að leita að manni í þjálfarateymið með sér og Henrik Bödker.
Brynjar Björn verður í þjálfarateymi í meistaraflokki Stjörnunnar og mun þjálfa 2. flokk félagsins en hann var ráðinn til starfa fyrir helgi.
Brynjar Björn verður í þjálfarateymi í meistaraflokki Stjörnunnar og mun þjálfa 2. flokk félagsins en hann var ráðinn til starfa fyrir helgi.
,,Við vorum að kasta nöfnum og hann kom fyrstur upp úr kassanum. Hann var fyrsti valkostur. Hann var erlendis þegar við hringdum í hann og þetta tók sinn tíma en þetta gekk upp og við erum ánægðir í Garðabænum," sagði Rúnar Páll í útvparsþættinum Fótbolti.net á X-inu á laugardag.
,,Það er hrikalega sterkt fyrir mig, leikmennina og klúbbinn að fá mann eins og Brynjar Björn til okkar. Hann er hokinn af reynslu og er frábær karakter sem á eftir að hjálpa okkur mikið. Við erum mjög ánægðir með þetta."
Rúnar Páll tók sjálfur við liði Stjörnunnar af Loga Ólafssyni á dögunum en hvaða áherslubreytingar mun hann koma með?
,,Áherslubreytingarnar mínar verða ekki svakalega miklar. Það verða kannski smá breytingar á sóknarleiknum en varnarleikurinn verður með mjög svipuðu sniði. Ég og Logi Ólafsson vorum mjög sammála um hann."
,,Ég vil spila skemmtilegan fótbolta með fáum snertingum og við munum vinna í því. Við erum með marga unga og skemmtilega stráka sem eru að koma upp og við munum reyna að spila boltanum í fáum snertingum frá þeim aftasta til þess fremsta."
Hér að ofan má hlusta á viðtalið við Rúnar í heild en þar talar hann meðal annars um vandamál sem Norðmenn standa frammi fyrir í yngri flokka starfinu.
