05.10.2023 10:30

Fjögur lið geta fallið í lokaumferðinni - Nokkrar sviðsmyndir

Fótbolti.net ræddi við Ómar Inga Guðmundsson, þjálfara HK, og spurði hann út í lokaleikinn.

„Nei, þetta er í rauninni ekki neitt öðruvísi en hver annar leikur, ekkert í undirbúningnum sem er öðruvísi. Auðvitað eru menn meðvitaðir um stöðuna og mikilvægi leiksins, en við munum ekkert fara í eitthvað öðruvísi upplegg."

HK vann síðast gegn Keflavík 9. ágúst. Eru frammistöður í síðustu umferðum sem Ómar hefur getað verið ánægður með?

„Það var meira á hefðbundna tímabilinu, þar voru jafnteflisleikir þar sem frammistöðurnar voru góðar. Jafnteflin núna í úrslitakeppninni; gegn Fylki og Fram, þau eru frammistæðilega séð jafn góð og í einhverjum jafnteflum þar á undan. Í þónokkrum af þessum jafnteflisleikjum var hægt að horfa í að ósanngjarnasta niðurstaðan hefði verið tap hjá okkur."

Annars eru allir heilir
Hvernig er staðan á hópnum?

„Það eru allir klárir, Örvar (Eggertsson) er í banni, kominn með fjögur gul spjöld í 26 leikjum. Það er um að gera að senda menn í leikbönn fyrir það," sagði Ómar og mátti heyra blöndu af pirringi og kaldhæðnistón í rödd þjálfarans. „En annars eru allir heilir og klárir í slaginn."

Hvernig er stemningin í hópnum?

„Hún er fín, við vorum með léttan fund eins og venjulega og æfingu á mánudaginn. Þá ræddum við leikinn gegn ÍBV og komandi viku. Það var frekar góður andi yfir hópnum og finnst það ennþá."

Ójafnvægi í stigasöfnunni og mikil sveifla í umræðu
Heldur þú að frammistöðurnar í undanförnum leikjum litist af því að staða ykkar í deildinni var nokkuð örugg?

„Já, því miður þá held ég það. Ég hef séð munstur sem ég hef séð áður í félaginu. Ef tímabil HK í efstu deild er skoðað; hvort sem það er núna eða undir stjórn Brynjars (Björns Gunnarssonar), þá er ákveðið ójafnvægi í stigasöfnun ef skoðað er hvar stigin eru tekin og gegn hverjum (í hvaða sætum andstæðingarnir eru). Það er eitthvað sem við ræddum og ætluðum okkur að ná að snúa. Það eru leikmenn í hópnum sem voru einnig í hópnum þá. Þetta er eitthvað sem við erum mjög meðvitaðir um að við þurfum að gera betur, en það hefur ekki tekist að snúa þessu."

„Að einhverju leyti þá hefur staðan í deildinni haft eitthvað með frammistöðurnar að gera. Mjög fljótlega var byrjað að tala um að við myndum ekki falla. Rétt fyrir tímabilið var umfjöllunin þannig að það kæmi ekkert annað til greina en að félagið færi beint aftur niður og okkur spáð mjög slæmu gengi. Sveiflan, frá því að það sé umræðan fyrir mót yfir í það að við séum búnir að bjarga okkur frá falli eftir 7-8 umferðir, er mjög mikil."

Vita ekki með hvaða hugarfari KA menn mæta til leiks
Við hvernig KA liði býstu á laugardaginn?

„Ég hef í rauninni ekki hugmynd. Við vitum ekkert við hverju við getum búist og ráðum ekkert yfir því. Við vitum ekkert hvort Haddi (Hallgrímur Jónasson) sé að fara gefa fullt af tækifærum eða spili á leikmönnum sem hafa spilað flesta leiki í sumar. Við vitum ekki hver mótivering þeirra er fyrir leikinn eða hvaða hugarfar þeir koma með inn í hann. Það er eitthvað sem verður að koma í ljós, eitthvað sem við getum ekki verið að velta okkur mikið upp úr. Ég býst við erfiðum leik fyrir norðan, síðasti heimaleikur þeirra og sama hvað sé undir eða hverjir spila, þá held ég að þú viljir alltaf gera vel í lokaleik tímabilsins og hvað þá þegar hann er á heimavelli. Ég býst við erfiðum andstæðingum en nákvæmlega hvernig KA-liðið verður samsett er erfitt að segja," sagði Ómar að lokum.

Leikurinn á laugardaginn hefst klukkan 14:00 og fer fram á Greifavellinum á Akureyri.