„Það er heldur betur ólga í Fjarðabyggð. Ég spilaði þarna árið 2016 og þekki mikið af fólki í kringum klúbbinn og í þessum bæjarfélögum," sagði Sverrir Mar Smárason í Ástríðunni.

„Það er almennt mjög mikil óánægja með fjölda útlendinga. Þetta er ekki í fyrsta skipti sem þetta kemur upp. Ástæðan fyrir því að við erum að tala um þetta núna fyrst eftir átta leiki er væntanlega sú að gengið er gott. Það er ólga og pirringur inni í klefa og úti í samfélaginu."

Að jafnaði hafa verið sjö erlendir leikmenn í byrjunarliði Fjarðabyggðar í leikjunum í sumar.

„Maður heyrir að ungu strákarnir í liðinu séu alls ekki sáttir," sagði Óskar Smári Haraldsson. „Maður heyrir að útlendingarnir gangi fyrir þegar kemur að því að borga laun og eftir tímabilið sé síðan gert upp við heimastrákana."

Hér að neðan má hlusta á umræðuna í Ástríðunni en þar var meira rætt um lið Fjarðabyggðar. Þar var meðal annars rætt að erfitt hafi verið fyrir Fjarðabyggð að fá íslenska leikmenn á láni undanfarin ár.