Auðvitað barst burstamálið svokallaða í tal á blaðamannafundi Erik Hamren og Arons Einars Gunnarssonar á Laugardalsvelli í dag.
Ísland mætir Tyrklandi í mikilvægum leik í undankeppni EM 2020 annað kvöld.
Það hitnaði heldur betur í kolunum fyrir leikinn í gær þegar einhver einstaklingur beindi uppþvottabursta að fyrirliða Tyrklands þegar hann var að ræða við fjölmiðlamenn í Leifsstöð.
Tyrknesku leikmennirnir voru þá ósáttir við móttökurnar sem þeir fengu á Keflavíkurflugvelli.
Sjá einnig:
Utanríkisráðherra Tyrklands: Óásættanleg framkoma á Íslandi
Tyrkneska þjóðin lét vel í sér heyra á samfélagsmiðlum í gær og þurftu tveir íslenskir íþróttamenn að senda frá sér yfirlýsingar á Twitter.
Aron Einar sagðist lítið vita um málið en íslenska liðið hefði lent í svipuðu þegar það flaug frá flugvellinum í Konya í Tyrklandi á sínum tíma.
„Ég man þegar við lentum frá Konya hvað við þurftum að ganga í gegnum. Það var svipað, vegabréfaeftirlit og við þurfum að fara í gegnum ítarlega öryggisleit. Það er það sem gengur og gerist þegar þú kemur frá svona óvottuðum flugvelli."
Erik Hamren, landsliðsþjálfari, vildi ekkert tjá sig um málið.
Athugasemdir
