Hákon Rafn, sem er 22 ára gamall, hefur komið virkilega sterkur inn í landsliðið og er búinn að eigna sér stöðu aðalmarkvarðar.

„Ef Thomas Frank (stjóri Brentford) heldur þessum Hollendingi í markinu, þá verð ég brjálaður," sagði Tómas jafnframt en Hákon er mála hjá Brentford. Hann gekk í raðir enska úrvalsdeildarfélagsins frá Elfsborg í Svíþjóð í janúar síðastliðnum. Hákon hefur ekki enn spilað með aðalliðinu þar sem Mark Flekken hefur verið í þeirri stöðu.

„Brentford var búið að skoða hann í langan tíma. Ástæðan fyrir því að þeir stökkva inn og yfirbjóða Aston Villa er bara sú að þeir ætluðu ekki að missa hann. Þeir ætluðu ekki að missa hann."

Það er þægileg tilfinning að hafa Hákon í markinu.

„Ég hef ekki einar einustu áhyggjur þegar boltinn kemur svífandi inn á teiginn. Þegar setningin 'kóngur í ríki sínu' var skrifuð, þá var hún skrifuð um Hákon Rafn Valdimarsson. Hann er svo rólegur og það sem ég elska við hann er að hann grípur helvítis boltann þegar hann getur það. Hann velur réttu augnablikin til að kýla hann. Hann var algjörlega frábær," sagði Tómas.

„Það sem er líka frábært við hann er að hann er fótboltamaður. Hann skilur fótbolta," sagði Benedikt Bóas Hinriksson en hægt er að hlusta á þáttinn í heild sinni hér fyrir neðan.