Kolbeinn: Vonandi kemst þetta í vana bráðum

„Það er alltaf fiðringur og spenna að koma inn í landsliðið og vera í þessum hóp. Virkilega gaman."

Fyrsti keppnisleikur Kolbeins með landsliðinu var gegn Lúxemborg í síðasta landsleikjaglugga. Sá leikur fór illa. Næsti leikur er gegn Lúxemborg á Laugardalsvelli á föstudag. Er hefnd efst í huga?

„Mér líður þannig og ég held að við séum allir sammála því að við ætlum að hefna fyrir síðasta leik, það var ekki nógu gott. Við viljum koma hérna á Laugardalsvöll, taka þrjú stig og hefna fyrir síðasta leik."

Þremur dögum síðar sigraði Ísland Bosníu á Laugardalsvelli. „Það var virkilega gott og ég fann milli leikjanna að við vorum alveg klárir í að rífa okkur í gang og svara fyrir leikinn í Lúxemborg. Við gerðum það, vorum aðeins þéttari til baka, fórum aðeins í grunngildin og náðum að skora í lokin. Það var virkilega fallegt."

Veðrið á ekki að vera frábært á föstudaginn, hentar það íslenska liðinu betur?

„Ég held það, við erum vanir þessu. Í Lúxemborg spiluðum við í 30 gráðum og það hentaði þeim betur, núna ætlum við að nýta okkur íslenska veðrið og íslensku geðveikina og vinna þennan leik."

Sé þetta daglega í Lyngby
Gylfi Þór Sigurðsson er samherji Kolbeins hjá Lyngby. En hvernig er að fá hann inn á landsliðsæfingar?

„Hann er ennþá ótrúlega góður og 'fit'. Maður er ekki að sjá neitt nýtt, sé þetta daglega á æfingum í Lyngby líka. Hann er ógeðslega góður og með 'presence' hér í landsliðinu. Það er gaman að hann sé mættur."

„Ég er mjög spenntur að sjá hann spila ennþá meira í Lyngby og komast ennþá meiri takt."

'One off' leikur
Talandi um Lyngby, síðasta leikur endaði með 5-0 tapi í Silkeborg. Hvað er hægt að segja?

„Ég hugsa að þetta sé bara 'one off'. Ég veit hvað í okkur býr og þetta var 'off' dagur. Þrjú mörk á átta mínútum, svona á ekki að gerast, en ég hef engar áhyggjur, mætum í næsta leik og rífum okkur í gang."

„Ég hef ekki persónulega talað við Stefán (Teit Þórðarson sem skoraði þrennu í leiknum) eftir þetta, en auðvitað flott hjá honum, má eiga það að hann gerir þetta ógeðslega vel."