„Hann (Foden) var góður að kyssa. Mér leið vel með þeim og Mason sagði að rassinn minn væri mjög flottur. Foden var sammála og Mason sagði við hann að ég væri stelpa sem hann ætti að vera með," segir Lára í viðtalinu meðal annars.

Foden og Greenwood var hent úr enska landsliðshópnum þar sem þeir brutu reglur um sóttvarnir með því að fá stelpurnar upp á hótel.

Lára hafði samband við Foden eftir að málið komst í fréttir en Foden var þá pirraður út í hana. „Af hverju gerðiru þetta, af hverju tókstu þessar myndir?" spurði Foden.

Lára tók myndir inn á hótelinu af bæði Greenwood og Foden. Ein mynd hefur vakið sérstaklega athygli en þá er Foden í nærbuxunum einum, með þær hálfgirtar niðrum sig. Myndirnar hafi verið settar í lokaða hópa á samfélagsmiðlum en svo lekið út.

Hödd Vilhjálmsdóttir, almannatengill, og Pablo Punyed, leikmaður KR, gagnrýna stúlkuna fyrir að taka myndir og setja á samfélagsmiðla.

„Ég tek það strax fram að ég er ekki að dæma fjórmenningana þar sem að mér ferst það ekki og hef gert fleiri mistök í lífinu en ég nenni að telja. Það eru samt nokkrir hlutir sem mig langar til að benda á tengt þessu máli," skrifar Hödd í pistli á Facebook en bæði Vísir og 433 vekja athygli á pistlinum.

„Hér eru fjórir ungir einstaklingar að gamna sér. Tveir eru jú efnaðir, karlkyns og með sterkt bakland í gegnum atvinnu sína. Það breytir því þó ekki að þroski þeirra er líklega ekkert meiri en fólks á þessum aldri og þar með að öllum líkindum alveg jafn viðkvæmir og jafnaldrar þeirra - bæði kvenkyns og karlkyns."

Stelpurnar hafa orðið fyrir áreiti á samfélagsmiðlum og margt ljótt verið sagt um þær í kjölfar málsins. Hödd segir það eðlilegt að koma þeim til varnar en bendir líka á aðra hlið málsins.

„Það er þó þannig að stúlkan / stúlkurnar myndaði til dæmis beran afturenda eins drengjanna og setti inn á samfélagsmiðla fyrir einhverja vini sína til að sjá. Myndinni var, eins og flestir vita, komið á fjölmiðla og fór þaðan í dreifingu. Í ofanálag er stúlkan í viðtali í breskum fjölmiðli þar sem hún greinir frá því að þau höfðu samfarir og að viðkomandi drengur kyssi mjög vel. Snúum dæminu við: Bretinn / Bretarnir hefðu myndað beran afturenda stúlkunnar, sett á samfélagsmiðla og myndirnar þaðan farið á fjölmiðla og í keyrslu víða um heim. Annar þeirra hefði svo farið í viðtal í fjölmiðli og talað um hæfni hennar í kossadeildinni og upplýst alla heimsbyggðina um að hann hefði haft samfarir við stúlkuna."

„Mig grunar að það þætti ekki jafn léttvægt og það er að mínu mati bara alls ekkert sanngjarnt. Karlmenn, hvað þá ungir, eiga engu minni virðingu skilið en konur."

Pablo Punyed, leikmaður Íslandsmeistara KR, tekur undir þessi orð. „Ímyndið ykkur ef það hefði verið strákur sem hefði tekið þessa mynd af stelpu og talað svo um smáatriðin," skrifar Pablo á Twitter.

Sjá einnig:
Yfirlýsing stelpnanna: Þeir létu okkur ekki vita að þeir væru í sóttkví