Kosta Ríka tryggði sér síðasta HM sætið - Sjáðu staðfesta riðla í Katar

Kosta Ríka vann 1-0 sigur gegn Nýja-Sjálandi í úrslitaleik umspils í Katar í gær og tryggði sér þar með síðasta sætið á HM í Katar sem var í boði.

Joel Campbell, fyrrum leikmaður Arsenal og nú leikmaður Monterrey í Mexíkó, skoraði eina mark leiksins strax á þriðju mínútu.

Nýja-Sjáland endaði leikinn með tíu menn en varamaðurinn Kosta Barbarouses fékk að líta rauða spjaldið á 69. mínútu eftir að dómarinn hafði skoðað brot hans í VAR skjánum.

HM hefst 21. nóvember í Katar en Kosta Ríka á fyrsta leik 23. nóvember, gegn Spáni. Liðin leika í E-riðli sem inniheldur einnig Þýskaland og Japan.

Kosta Ríka hefur sex sinnum komist í lokakeppni HM og þetta verður þriðja mótið í röð sem liðið tekur þátt í.