Bayern München er komið áfram í undanúrslit Meistaradeildar Evrópu eftir að hafa unnið Arsenal, 1-0, á Allianz-leikvanginum í München í kvöld. Manchester City og Real Madrid eru á leið í framlengingu.
Síðustu tíu ár hefur Bayern verið með algert tak á Arsenal og verður engin breyting á því strax.
Liðin gerðu 2-2 jafntefli í fyrri leiknum á Emirates-leikvanginum og mátti því búast við öðrum hörkuleik í kvöld.
Í fyrri hálfleiknum var þetta stál í stál. Liðin voru ekki að gefa mörg færi á sér í fyrri hálfleiknum en það lifnaði aðeins betur yfir þessu í síðari.
Leon Goretzka átti skalla í slá í upphafi síðari hálfleiks áður en David Raya varði frákastið frá Raphael Guerreiro.
Bayern náði ágætis stjórn á leiknum og þegar tæpur hálftími var eftir kom sigurmarkið. Leroy Sane kom með fyrirgjöf frá hægri sem fór yfir allan pakkann og á Guerreiro. Hann kom með boltann inn í teig og þar var Joshua Kimmich mættur á ferðinni og þrumuskallaði boltann í netið.
Arsenal tókst ekki að jafna leikinn og er því úr leik í Meistaradeildinni þetta árið. Þetta er í fimmta sinn á síðustu tuttugu árum sem Bayern hendir Arsenal úr úrslitakeppninni.
Bayern hefur átt slakt tímabil í Þýskalandi en ekki annað hægt en að hrósa liðinu fyrir árangurinn í Meistaradeildinni.
Framlengt á Etihad
Manchester City og Real Madrid eru á leið í framlengingu á Etihad-leikvanginum en staðan þar er 1-1.
Liðin gerðu 3-3 jafntefli í svakalegum leik á Bernabeu í síðustu viku og hefur þessi einnig verið þokkaleg skemmtun.
Rodrygo skoraði fyrir Madrídinga á 12. mínútu eftir einfaldan undirbúning Vinicius Junior. Ederson varði fyrsta skot Rodrygo, sem fékk síðan boltann aftur og kláraði í netið.
Erling Braut Haaland kom sér í ágætis skallafæri sjö mínútum síðar en boltinn í slá.
Man City var undir í hálfleik en í þeim síðari var liðið með öll völd og Madrídingar sættu sig bara við að verjast.
Það var því vel verðskuldað þegar Kevin De Bruyne jafnaði metin á 76. mínútu. Jeremy Doku sendi frá sér boltann, sem fór af Antonio Rüdiger og til De Bruyne sem setti boltann upp í þaknetið.
Heimamenn fengu fullt af tækifærum til að gera út um leikinn undir lokin. De Bruyne fékk boltann í miðjum teignum á 82. mínútu en setti boltann hátt yfir.
Ekki var meira skorað eftir venjulegan leiktíma og fer nú að hefjast framlenging.
Úrslit og markaskorarar:
Bayern 1 - 0 Arsenal (3-2, samanlagt)
1-0 Joshua Kimmich ('63 )
Manchester City 1 - 1 Real Madrid (Framlengt)
0-1 Rodrygo ('12 )
1-1 Kevin De Bruyne ('76 )
Athugasemdir