Lið vikunnar í enska - Salah, Kane og Firmino

Edouard Mendy (Chelsea) - Markvörðurinn sá til þess að Chelsea náði öllum stigunum gegn Brentford.

Joao Cancelo (Manchester City) - Fór frekar rólega af stað í City treyju en er núna kominn á rosalegt flug.

Mohamed Salisu (Southampton) - Stóð vaktina frábærlega í hjarta varnarinnar í 1-0 sigri gegn Leeds.

Angelo Ogbonna (West Ham) - 1-0 útisigur gegn Everton. Ogbonna skoraði og liðið hélt hreinu. Þarf ekki að segja meira.

Dimitris Giannoulis (Norwich) - Gríski vinstri bakvörðurinn hélt upp á 26 ára afmæli sitt með flottri frammistöðu í markalausum leik gegn Brighton.

Bernardo Silva (Manchester City) - Var stjarna sýningarinnar, skoraði í 2-0 sigrinum gegn Burnley.

Declan Rice (West Ham) - Átti miðsvæðið gegn Everton.

John McGinn (Aston Villa) - Átti ekki skilið að vera í tapliði þegar Villa beið lægri hlut gegn Úlfunum. Var sískapandi og skilaði marki og stoðsendingu.

Mohamed Salah (Liverpool) - Er að margra mati besti leikmaðurinn á plánetunni jörð í dag.

Harry Kane (Tottenham) - Opnaði loks markareikning sinn í deildinni á tímabilinu. Hjálpaði Spurs að leggja Newcastle.

Roberto Firmino (Liverpool) - Skoraði þrennu gegn Watford.