Stuðningsmaðurinn sem skallaði Billy Sharp, leikmann Sheffield United, hefur verið dæmdur í 24 vikna fangelsi á Englandi.
Þetta kemur fram í enskum miðlum en stuðningsmaður Nottingham Forest réðst á Sharp eftir leik gegn Sheffield í umspili ensku Championship-deildarinnar á þriðjudag.
Forest tryggði sér sigur í umspilinu í vítaspyrnukeppni og eftir leikinn fóru margir stuðbningsmenn liðsins inn á völlinn.
Sharp stóð rólegur á hliðarlínunni er atvikið átti sér stað þegar maðurinn kom hlaupandi og réðst að honum með höfuðið fyrst. Forest hefur einnig bannað manninum að mæta á leiki liðsins til æviloka.
Sauma þurfti fjögur spor í vör Sharp eftir árásina en sem betur fer þá slasaðist hann ekki alvarlega.
Maðurinn mun nú sitja inni næstu 24 vikurnar og verður ekki gestur á leik Forest í framtíðinni.