Kanadíski sóknarmaðurinn Jonathan David hefur gert magnaða hluti með belgíska liðinu Gent á þessari leiktíð en hann stefnir á að spila í Þýskalandi.
David, sem er 20 ára gamall, skoraði 23 mörk í 40 leikjum fyrir Gent á leiktíðinni en belgíska deildin var flautuð af á dögunum vegna kórónaveirunnar.
Arsenal, Manchester United og Bayern München hafa sýnt honum mikinn áhuga en hann vill spila í Þýskalandi.
„Ég hafði ekki hugmynd um að stórliðin myndu strax hafa áhuga á mér en ég er tilbúinn að taka næsta skref. Það er tími fyrir mig að fara og á stað þar sem ég get haldið áfram að þróa leik minn," sagði David við Sky Sports.
„Þýska deildin er sú deild sem myndi henta mér best í augnablikinu. Hún er mjög svipuð belgísku deildinni en það eru auðvitað meiri gæði í Þýskalandi og meiri samkeppni," sagði hann í lokin.
Bayern München er því líklegasti kosturinn en þar er einmitt annar landsliðsmaður Kanada, Alphonso Davies, sem kom frá Vancouver Whitecaps árið 2018 og hefur tekist að vinna sér inn sæti í byrjunarliðinu.
Athugasemdir