Stjarnan skoraði níu mörk á útivelli gegn Fylki í undanúrslitum Mjólkurbikarsins í dag.
Ólafur Guðbjörnsson þjálfari Stjörnunnar var mjög ánægður með frammistöðu sinna manna og er spenntur fyrir úrslitaleiknum.
„Þessi leikur var hálfgert furðudýr í raun og veru. Það var smá bras í byrjun og þær byrja á því að skora, síðan tókum við allt vald á vellinum. Þetta var sannfærandi og öruggur sigur og er ég mjög ánægður með mitt lið," sagði Óli.
Harpa setti fernu í leiknum og er Óli sammála fréttamanni um að hæfileikar hennar hafi verið afdrifaríkir í leiknum.
„Hún tók á skarið, það er gott þegar menn stíga svona upp. Við höfum fína sóknarlínu og þetta var liðsheildin í dag sem kláraði þetta, en Harpa var afgerandi, við getum alveg sagt það."
Óli segir það ekki skipta neinu máli hvort Stjarnan mæti Val eða Breiðablik í úrslitaleiknum.
„Það verður bara gaman á Laugardalsvelli eins og áður. Okkur líður vel þar og okkur langar að ná í þennan bikar sem er í boði."
Athugasemdir