Efri hluti
FH 2 - 1 Valur (16:15 í dag)
FH-liðið er að gera virkilega vel og eru þær vel þjálfaðar. Valur hafa verið á ágætis skriði undanfarið en FH kemst snemma í 2-0 með mörkum frá Thelmu Karen sem hefur verið mögnuð í sumar og svo skallamarki frá Önnu Heiðu. Hafrún og Ingibjörg með sitthvora stoðsendinguna. Valur verða betri í seinni hálfleik og minnka muninn þegar um 10 mínútur eru eftir með marki frá Fanndísi.

Augnablik umferðarinnar verður hins vegar þegar Brynjar Sigþórsson í þjálfarateymi FH ákveður að hlaupa inn á völlinn í miðri skyndisókn hjá Val á síðustu mínútu þar sem þær eru að sleppa í gegn og straujar leikmann Vals niður. Hann fær að sjálfsögðu rautt spjald en hann reynir að mótmæla spjaldinu þangað til að Hlynur dregur hann út af vellinum. Daginn eftir verða FH með vinkonuæfingu þar sem allar í liðinu eiga að reyna að fá vinkonu úr öðru liði til að koma á æfingu.

Þróttur R. 2 - 1 Víkingur R. (18:00 í kvöld)
Þróttur eru búnar að vera mjög góðar í sumar og Víkingur hafa verið svakalegar undanfarið þannig þetta verður spennandi leikur en Óli Kri og hans teymi munu setja þennan leik vel upp og sigra hann. Sæunn og Þórdís Elva skora fyrir Þrótt og Bergdís skorar fyrir Víking.

Breiðablik 4 - 2 Stjarnan (18:00 í kvöld)
Mér sýnist Breiðablik vera óstöðvandi en ég held að þetta verði skemmtilegur leikur og liðin munu skiptast á að skora áður en Breiðablik klárar þetta undir lokin með tveimur mörkum. Úlfa Dís, einn besti leikmaður deildarinnar og Fanney Lísa, einn efnilegasti leikmaður landsins munu skora fyrir Stjörnuna. Gylfi Tryggvason, aðdáandi Stjörnunnar verður rekinn úr stúkunni um miðjan seinni hálfleik þegar hann öskrar í fimmtugasta skiptið inn á völlinn til að gagnrýna frammistöðu Stjörnunnar. Hann kallar eftir skýrari sjálfsmynd og að liðið þrói með sér sömu þráhyggju yfir frammistöðu og Grindavík/Njarðvík eins og hann orðaði það svo skemmtilega um daginn.

Neðri hluti
Þór/KA 1-1 Tindastóll (19:15 í kvöld)
Þetta er stærsti leikur umferðarinnar og tveir frábærir þjálfarar að mætast. Það verður biluð stemning í Boganum en þetta verður hins vegar mjög lokaður leikur. Tindastóll verður betri aðilinn í leiknum og komast yfir á 85 mínútu en Bríet Fjóla hjá Þór/KA mun jafna lekinn á síðustu mínútu.

Fram 2-0 FHL (14:00 á laugardag)
Fram vinnur þennan leik þægilega 2-0 með mörkum frá Murielle og Öldu. FHL hafa verið óheppnar í sumar og sennilega átt skilið að fá fleiri stig. Fram hins vegar hafa komið öllum á óvart með frábærum árangri og þar á Óskar Smári og hans teymi skilið stórt hrós. Óskar verður svo ánægður með þennan sigur að hann mun fara í lengsta viðtal sögunnar eftir leik. Viðtalið verður í 32 mínútur en því lýkur loksins þegar hann missir röddina en hann mun samt reyna að halda áfram að tala en fréttaritarinn stoppar upptökuna.

Fyrri spámenn
Adda Baldurs (5 réttir)
Bára Kristbjörg (4 réttir)
Guðmunda Brynja (4 réttir)
Margrét Lára (4 réttir)
Magnús Haukur (4 réttir)
Vigdís Lilja (4 réttir)
Mist Rúnarsdóttir (4 réttir)
Hulda Ösp (3 réttir)
Katla Guðmunds (3 réttir)
Guðný Geirs (3 réttir)
Orri Rafn (3 réttir)
Guðrún Karitas (3 réttir)
Katla Tryggvadóttir (3 réttir)
Gylfi Tryggvason (3 réttir)
Emelía Óskarsdóttir (3 réttir)
John Andrews (2 réttir)
Ásta Eir (2 réttir)

Hér fyrir neðan má sjá stigatöfluna í Bestu deild kvenna eins og hún er akkúrat núna.