Skagamaðurinn Björn Bergmann Sigurðarson skoraði sitt fyrsta A-landsliðsmark í sigrinum gegn Kosóvó á föstudaginn. Hann er nú mættur til Dublin með landsliðshópnum en framundan er vináttuleikur gegn Írum á þriðjudag.
Björn ræddi við Fótbolta.net í garðinum við hótel íslenska landsliðsins.
„Það var frábær tilfinning að sjá boltann fara í netið og komast einu marki yfir. Það var frábær tilfinning. Þetta var rosalega erfiður leikur og við vissum að við þyrftum að berjast og halda samheldninni,"
Eins og mikið hefur verið fjallað um er Björn Bergmann fjórði bróðirinn sem skorar fyrir íslenska landsliðið. Móðir hans, Bjarney Jóhannesdóttir, hefur því eignast fjóra syni sem skorað hafa fyrir Ísland.
Björn er búinn að heyra í bræðrum sínum.
„Ég heyrði í þeim eftir leikinn og þeir voru náttúrulega rosa stoltir eins og öll fjölskyldan, yfir því að ég skoraði þetta mark og við unnum leikinn. Mamma hefur verið aðeins í sjónvarpinu og er heldur betur að njóta athyglinnar."
Björn, sem spilar fyrir Molde í Noregi, kom inn í landsliðið í þessari undankeppni en áður hafði hann leikið einn A-landsleik, það var árið 2011. Við spurðum hann út í hvernig upplifunin hefur verið.
„Það er búið að vera rosalega skemmtilegt. Þetta er hrikalega flottur hópur, allir eru vinir og það er ekkert vesen. Það er búið að vera rosalega skemmtilegt, miklu skemmtilegra en ég bjóst við."
Viðtalið má sjá í heildinni í sjónvarpinu hér að ofan en þar talar Björn meðal annars um leikinn gegn Írum.
Fótbolti.net er með öflugt teymi í Hollandi og er hægt að fylgjast með öllu bak við tjöldin á Snapchat (Fotboltinet), á Instagram og öðrum samskiptamiðlum okkar.
Leikir Íslands á EM:
Ísland 0-1 Frakkland
Ísland 1-2 Sviss
Ísland 0-3 Austurríki
