Bestur í 2. deild: Byrjaði frammi og skoraði tvö - Fór svo á miðjuna

Davíð Þór Ásbjörnsson, leikmaður Kórdrengja, átti mjög góðan leik gegn Dalvík/Reyni þegar Kórdrengir sóttu þrjú stig á Dalvík/Reynir í miðri síðustu viku. Leikurinn var liður í 12. umferð deildarinnar en þeirri tíundu ef litið er framhjá frestuðum umferðum.

Davíð skoraði bæði mörk toppliðsins í 1-2 útisigri. Davíð lék í framlínu Kórdrengja í fyrri hálfleik og féll svo niður á miðjuna þegar leið á leikinn. Bæði mörk Davíðs komu eftir sendingu frá Alberti Brynjari Ingasyni. Fyrir frammistöðuna er Davíð Þór ICE-leikmaður umferðarinnar í 2. deild. Það eru þeir Sverrir Mar Smárason og Óskar Smári Haraldsson, umsjónarmenn hlaðvarpsþáttarins Ástríðan sem sjá um valið á leikmanni umferðarinnar. Hlusta má á nýjustu þættina hér neðst í þessari frétt.

„Vel að því kominn, tvö mörk - kemur Kórdrengjum 2-0 yfir og fer svo niður á miðjuna og brýtur sóknir niður hvað eftir annað," sagði Óskar Smári.

„Frábær í þessum leik. Byrjaði frammi með Alberti í 3-5-2," sagði Sverrir Mar.

Davíð Þór er fæddur árið 1992 og er á sínu öðru tímabili með Kórdrengjum. Hann gekk í raðir félagsins frá Fylki um mitt sumar í fyrra. Ásamt því að hafa leikið með Fylki á sínum ferli þá lék Davíð tvö sumur með Þrótti Reykjavík.