Oliver Helgi Gíslason skoraði þrennu þegar Haukar sigruðu Völsung á útivelli í 2. umferð 2. deildar karla um síðustu helgi. Oliver er leikmaður 2. umferðar hjá Fótbolti.net

Oliver svaraði nokkrum spurningum frá fréttaritara í kjölfar valsins. Oliver skipti yfir í Hauka frá KA árið 2018. Hvernig kom það til?

„Það kom bara þannig til að mig langði að breyta til var búinn að vera á Akureyri bara frá því ég fæddist og að spila með KA, þannig langaði að prófa eitthvað nýtt og flutti suður, fór á æfingar með Haukum og gekk vel og leyst bara vel á þá," sagði Oliver.

„Fyrsta svona alvöru tímabilið með meistaraflokki í fyrra gekk ekki nægilega vel, féllum og var ég mikið meiddur í bakinu og var lítið 100% síðasta árið."

Hvernig var leikurinn á Húsavík?

„Mér fannst við stjórna leiknum frekar vel og þrátt fyrir að hafa lent undir tvisvar misstum við aldrei tök á leiknum, svo í seinni hálfleik þá settum við auka púður í okkar aðgerðir og sigldum þremur sterkum stigum í hús."

„Ég spilaði hægri kant í síðasta leik, hef verið að spila þar eða frammi í vetur. Það hefur gengið vel, skorað og lagt upp mikið á undirbúningstímabilinu og vonandi heldur það bara áfram. Hef verið að mestu meiðslalaus í vetur og vonandi verður það þannig í sumar."

Hver eru markmið Olivers í sumar?

„Persónuleg markmið er klárlega að reyna hjálpa liðinu sem mest að komast upp aftur, halda áfram að skora og leggja upp og spila miklu meira."