Hallgrímur Jónasson: Hefðum getað komist í 2-0 eftir þrjár mínútur

Auglýsing

Mynd: Fótbolti.net - Hafliði Breiðfjörð

„Virkilega ánægður með fyrri hálfleikinn, að mínu viti sundurspiluðum við þá. Komumst í margar frábærar stöður, en því miður vildi boltinn ekki inn í dag. Held við hefðum getað komist í 2-0 eftir þrjár mínútur. Mjög svekktur með úrslitin, en samt ánægður með margt. Ánægður með þennan viðburð, ánægður með að við höldum hreinu og ótrúlega flott KA hjarta í liðinu,'' sagði Hallgrímur Jónasson, þjálfari KA, eftir 0-0 jafntefli við erkifjendurna í Þór.

Lestu um leikinn: KA 0 - 0 Þór

Talsverður hiti var bæði í stúkunni og inná vellinum. Hvernig upplifði Hallgrímur þetta á hliðarlínunni?

„Já, mér fannst leikurinn harður en "fair". Mér fannst ekki eitthvað mikið bull, kannski eitt atvik. Það er tæklað Grímsa tveggja fóta í sköflunginn, en ekkert dæmt. En annars fannst mér leikurinn vel dæmdur, liðin tókust á því en mér fannst leikmenn inná vellinum vera "fair" og dómararnir höfðu bara gott kontról á þessu,'' sagði Hallgrímur.

Adam Ægir Pálsson spilaði sinn annan leik fyrir KA og var lúsiðinn frá fyrstu mínútu. Hallgrímur hrósaði honum í hástert.

„Ég er mjög ánægður með hann. Maður vissi ekki alveg hvernig standið væri á honum, af því að hann var búinn að vera að æfa sjálfur og hljóp mikið í síðasta leik. En hann er flottur, það eru hann og Gaui sem eru að skapa hérna í fyrri hálfleik og það eru mikil gæði í honum. Ég er líka bara ánægður með hugarfarið hans, hann kemur bara auðmjúkur og tilbúinn að leggja sig fram. Þetta er strákur sem er búinn að spila í flottum liðum á háu leveli og veit hvað þarf til. Ég er bara gríðarlega ánægður með hann,'' sagði Hallgrímur Jónasson.