Besta deildin: Ágúst tryggði Blikum mikilvæg þrjú stig

Breiðablik marði 1-0 sigur á ÍBV í 16. umferð Bestu deildar karla á Eikarvellinum í Kópavogi í kvöld.

Eyjamenn byrjuðu af krafti og Anton Ari Einarsson þurfti snemma að taka á honum stóra sínum þegar Vicente Valor reyndi á hann. Blikar færðu sig hins vegar smám saman framar á völlinn og náðu betri tökum á leiknum.

Þegar um hálftími var liðinn var Viggó Valgeirsson hársbreidd frá því að koma ÍBV yfir en skalli hans eftir aukaspyrnu hafnaði í stönginni.

Blikar voru líklegri til að brjóta ísinn undir lok fyrri hálfleiks. Sending Ágústs Orra Þorsteinssonar fór af varnarmanni og stefndi í markið en Ari í Haraldstovu Petersen náði að reka tána í boltann og bjarga á síðustu stundu.

Tréverkið þvældist svo fyrir í annað sinn fáeinum mínútum síðar. Kristinn Steindórsson fékk boltann inni í vítateignum, sneri laglega en þrumaði honum í þverslána.

Blikar voru fljótir að brjóta ísinn í síðari hálfleik. Ágúst Orri fékk boltann í þröngu færi og náði skoti sem Ari varði. Boltinn féll aftur fyrir fætur Ágústs sem stýrði honum í nærhornið.

Leikurinn opnaðist lítið eftir markið og það var ekki fyrr en á 77. mínútu sem Eyjamenn ógnuðu af alvöru. Pisco fékk boltann á hættulegum stað inni í vítateignum en stýrði honum rétt fram hjá.

Jöfnunarmarkið lét á sér standa og Blikar fögnuðu mikilvægum þremur stigum. Þeir eru í fjórða sæti með 29 stig og hafa tíu stiga forskot á næsta lið fyrir neðan. ÍBV situr í áttunda sæti með 16 stig.