Rúnar tekur undir gagnrýni á leikform Stjörnuliðsins - „Leikmenn þurfa líka að líta í eigin barm“

„Mér leið rosa vel í Gróttu, frábært þjálfarateymi, frábær stjórn, duglegt fólk að vinna kringum liðið og leikmannahópurinn frábær. Góður klefi og mér leið hrikalega vel þarna þannig að ég var ekkert á leiðinni frá Gróttu fyrr en Stjarnan talaði við mig. Þá fannst mér ekki hægt að stökkva frá því þegar þeir komu og buðu mér starfið,“ segir Rúnar.

Tekur undir að liðið hafi ekki verið í formi
Stjarnan endaði í 7. sæti Bestu deildarinnar á nýloknu tímabili og verður það að teljast mikil vonbrigði þar sem liðinu var spáð 3. sæti fyrir tímabil..

„Mér finnst Stjörnuliðið bara hafa spilað langt undir pari. Mér finnst leikmannahópur mjög öflugur, góðir leikmenn í hverri einustu stöðu og við þurfum bara að virkja það ennþá frekar og fá menn til að bæta sig í öllu, sóknarleik, varnarleik og líka bara hugarfari,“ segir Rúnar.

Liðið var m.a. gagnrýnt fyrir skort á formi, geturðu tekið undir það?

„Já, ég get alveg tekið undir það. Og í þessu sporti eða í fótbolta þarftu að vera í öflugu formi og það leikmenn þurfa líka að líta í eigin barm þar og þú vilt vera í besta forminu til þess að ná árangri. Það er ekki árangur ef það er ekki í góðu formi, það er bara þannig,“ segir Rúnar.

Býst við fullmótuðu þjálfarateymi í lok vikunnar
Viktor Bjarki Arnarsson var kynntur sem nýr yfirmaður fótboltamála á blaðamannafundi Stjörnunnar í dag en ekki var tilkynnt um hver yrði með Rúnari í þjálfarateyminu.

Hvenær kemur það í ljós?
„Bara vonandi í lok vikunnar eða um kringum helgina, við náum að klára það. Það er allt í fullri vinnslu og já, vonandi náum við að klára það. Það er mjög sterkt fyrir okkur að vera með öflugt þjálfarateymi og teymi kringum þessa stráka og til þess að þeir nái sér bestum árangri,“ segir Rúnar.

Vill berjast um titla
Aðspurður um hvar hann vilji sjá Stjörnuna eftir eitt ár svaraði Rúnar í efri hluta deildarinnar og að berjast um titla. „Þannig á það að vera á öllum vígstöðvum. Stjarnan á bara að vera þar og setja metnað sinn í að vera eitt af toppliðum deildarinnar,“ sagði Rúnar að lokum.

Viðtalið má sjá í heild sinni í spilaranum hér að ofan.